Eph 3 | MHL | STEP | Aria yo Yeesus Krais-ke uuwowa yieya ona opor eliwa nain ni miiw oko teeria nia maakem-miem. Muut nain yo efa opap koora-pa efa wuiwkin fan ikem. Ni Mua Maneka teeria wiar areman, naapeya yo ni nia naep Mua Maneka faremi nokariyem.

Ephesians 3

Pol uuwowa wi miiw oko teeria Yeesus Krais opora wia maakek

1 Aria yo Yeesus Krais-ke uuwowa yieya ona opor eliwa nain ni miiw oko teeria nia maakem-miem. Muut nain yo efa opap koora-pa efa wuiwkin fan ikem. Ni Mua Maneka teeria wiar areman, naapeya yo ni nia naep Mua Maneka faremi nokariyem. 2 Aria Mua Maneka ona nia kemalep opora nain yo yieya nia maakem-miawiyem. Naeya yo uuwowa nain iiriw efar amisareman. 3 Opora eena miimowa-pa siisimem nain iiw muuta siisimem, feenap, Krais uuwow onoma nain iiriw kokot ikua. Ne aakisa ona yo ariman wuomemi efa ofakowak. 4 Naeya i miiw mua muuta umep yia aawok nain kemena wiar amisarowa yoowa nain yo balisow akena wiar amisarem. Ne yo opora siisimem fain unufap naap efa furewowen. 5 Fain, ni owow oko teeria Yeesus Krais opor eliwa opiman. Neeke i Isrel yiamiya arep i unow onaiya teeria kuisow aremi Krais mia ara kuisow wiar aremik. Ne maa unowa Mua Maneka-ke yia wuomak nain Yeesus Krais opora yia opomaya i unow onaiya makena urufiyen. Opora nain Mua Maneka-ke iiriw ariman me wuowa ikua. Ne aakisa Ewar Eliwa-ke opora nain i aposel ne wi profet ariman yia maakeya maimik.

7 Yo opor eliwa fain nia maakowa nain Mua Maneka onaiw efa kookalep efa pepekimok. Ne ona kekanowa yieya yo kekanep uuwowa fain faiyem. 8 Makena, yo Mua Maneka teeria nain yo meta marew akena. Nain ona efa kookalep Krais opor eliwa wi owow oko teeria wia maakem-miawe naep uuwowa fain yiek. Opora feenap, Krais ekima-pa maa eliwa unowa yiar imenariya, maa unowa eena Krais yia onomak nain manek akena-ke. Wiar kema suuwowa iiwawun yiar nomakek. 9 Opor unowa nain Mua Maneka iiriw ekera pipilimep-puak ne aakisa yo uuwowa nain yiek. Ne yos-ke opora nain ariman wiar wuami Yeesus Krais sira kamenap onap yia aawiya nain nia maakiyem. 10 Mua Maneka Krais uuwowa-pa yia aawowa nain ona iiriw ekera maep-puak. Feenap maek, Krais teeria sira naap wia onamkun wi owow iinan ensel ne wi aaperek inasina yena woos eliwa, kema suuwowa eliwa efar amisaruk, naap maep aakisa yiena Maneka Yeesus Krais mia-pa nan imenak. 12 I Krais opora wiar opimik, naeya o muuta nain keker opowa marew, emin ururowa marew, Mua Maneka wameiya ekami eliw maa nokarimik. 13 Naapeya nia maakiyem, yo Yeesus Krais opor eliwa nia maakemkun efa samoriwkin sirirowa unowa aawiyem fain ni kema unu-unowa me wueka. Yo sirirowa aawiyem fain ni Mua Maneka wameiya ikok unum maneka aawowen. Naapeya ni kema me pinareka.

Pol-ke wi Efesus kekanep ikauk naep Mua Maneka farek

14 Wi owow iinan ensel ne i miiwa-pa ikemik fain yiena Auwa ona waisow, ne i unowiya unuma o tepak-pa wiar ikemik. Naapeya yo maa unowa maem nain kema suuwap keema muuna mikami Auwa Mua Maneka unuma fakeriyem. 16 Ne feenap nokariyem, ona Ewar Eliwa sesekeya ni nia kekanoweya ni iiwawun kekanep ikowen. Ne nia kemalep ona kekanow maneka-pa nia kekanowinon. 17 Naeya ni kekanep Krais opora wiar opiwkin ni niar ikaeya o kemaiw ikowen. Ne mua oko wia kookalowa sira nain kema manekiw ikowen. Sira nain nomokow fiira miiw tepak orop kekanep iimarep ikaiya naap. 18 Naeya Krais manek akena yia kemaliya nain ni baliwep amisarowen, Mua Maneka ona teeria unow onaiya. O yia kookal-afurap manek akena yia kemalowiw ikaiya. Manek akena nain epa iiwawun ifemakep ikua, oram anane maneka wiar ikaiya. Ne ni balisow akena amisarep maowen, “Krais yia kookal-afurap yia kemalowiw ikaiya,” naap maowen. Naeya Mua Maneka sira melina, amis manek akena sira naap nain niar taaninon. 20 Ne aria i Mua Maneka unuma fakerikua. O kekanowa i gone-pa yiar uuwam-ikaiya. Naeya i o kema suuwap maa unowa nokarimik nain maa mauwa nokarimik nain, os-ke iinan-pa maa kuruma yia wuominon, i kema suuwowa me pepek. Naapeya i Yeesus Krais teeria-ke o unuma unufami Mua Maneka unuma fakeram-ikaikua, anane naap manekiw.